Allo Negro, formado por Isa (voz), Ernesto (guitarra), Javi (guitarra), Jorge (baixo), Ramón (batería), Glen (saxo) e Pablo (trompeta) xurdiu «de forma natural», segundo explican, cando os membros de Mulberry Blues decidiron comezar a compoñer temas propios en galego. Todos eles atesouran unha dilatada experiencia en proxectos anteriores. O seu guitarrista solista, Ernesto de Gregorio, liderou The Shoubiñas Experience, grupo vigués de blues e rock que hai unha década gravou con Philip R. Newell, produtor e enxeñeiro acústico que traballou con Led Zeppelin, Queen, Mike Oldfield, The Who e Pink Floyd, entre outros.

Os acompañantes da noite serán os Blue Monday, que ofrecerá os mellores ritmos de blues, swing e soul clásico. A banda está integrada por Irra Chouza (guitarra), Txelu Barreira (contrabaixo) e Walter Pelayo (batería), músicos habituais da escena viguesa que ademais forman parte noutros recoñecidos proxectos en activo (La Chata Soul, Layuca, ou El Cuarto De Tula Homenaxe a Buena Vista Social Club, entre outros…). Como guinda a este cuarteto contarán con Laura Taka á voz (Mitic El Espectáculo, Samba De Batea ou Cherry Sweet).