Alba Gil

Alba Gil Aceytuno e a súa banda chegan por primeira vez a Vigo para presentar Aguayro, primeiro disco do proxecto.
Aguayro nace coa idea de plasmar a personalidade, influencias e estilo de Alba, acompañada de músicos cos que ten unha conexión especial desde hai anos.

Todos os temas están compostos por ela, con tinguiduras de jazz, hip-hop, punk rock e folclore canario. O disco móvese entre o instrumental e o cantado, poñéndolle palabras ás súas inquietudes e percepcións. Os temas, cargados de enerxía, intercalan momentos frenéticos con outros delicados e calmos.

A banda publicou o seu primeiro álbum en 2021 e desde aí tocaron nas salas e festivais máis importantes das illas, viaxando tamén a Canadá, Polonia e Barcelona entre outros. En 2022 recibiron o premio a mellor disco de jazz e musical de fusión nos Premios Canarios da música; e en abril de 2023 gañaron o concurso Sonora, celebrado na capital Gran Canaria.