AL DI MEOLA é un dos grandes guitarristas do noso tempo, cun currículo ao alcance de poucos, e o 16 de novembro chegará a Vigo para un concerto moi especial no Teatro García Barbón. A súa exitosa traxectoria abarca xa máis de catro décadas, onde o músico norteamericano acumula, entre outros logros, catro discos de ouro, dous de platino e máis de seis millóns de discos vendidos en todo o mundo.

A lista de recoñecementos que recibiu ao longo dos anos é tamén extensa: entre outros, un Doutoramento Honoris Causa do prestixioso Berklee College of Music, o Premio Honorífico Miles Davis outorgado polo Festival de Jazz de Montreal, un Premio á Traxectoria da BBC outorgado por Sir George Martin en 2008 ou numerosos nomeamentos e premios Grammy.

Un auténtico xenio da guitarra e un prolífico compositor, con máis de 30 álbums como líder, ademais de moitos outros onde participou, con figuras como o supergrupo de fusión Return to Forever (con Chick Corea, Stanley Clarke e Lenny White), o soado Guitar Trio (con John McLaughlin e o seu admirado Paco de Lucía), ou o trío Rite of Strings (co baixista Clarke e o violinista Jean-Luc Ponty).

O músico de New Jersey colaborou tamén con artistas como Luciano Pavarotti; estrelas do pop como Paul Simon, Stevie Wonder ou Phil Collins; referentes do rock como Jimmy Page, Steve Vai, Carlos Santana ou Frank Zappa; ou grandes músicos de jazz como Herbie Hancock ou Les Paul.

Pioneiro na fusión de músicas do mundo e jazz, continuou explorando ao longo da súa carreira a rica influencia do flamenco, o tango, a música de Medio Oriente, brasileira ou africana. Aínda que a súa cegadora técnica tanto coa guitarra acústica como coa eléctrica convertérono nun dos grandes para as hordas de fanáticos das seis cordas que acoden regularmente aos seus concertos, a profundidade da escritura da o Di Meola, xunto coa emotividade e o lirismo da súa expresión guitarrística, fixéronlle gañarse a numerosos fans en todo o mundo, máis aló do ámbito dos afeccionados á guitarra.

Entradas