O Camões – Centro Cultural Portugués en Vigo presenta, o día 18 de decembro ás 20:00, o espectáculo Ai, Mário Viegas! Ai! (Primeira parte), desenvolvido polo grupo de teatro afeccionado Eu.Experimento, baixo a dirección de Afonso Becerra de Becerreá.

A entrada é libre, pero require reserva previa a través dos seguintes contactos: Tel: (+34) 986 430370 / ccp-vigo@camoes.mne.pt. Os billetes reservaranse ata media hora antes do comezo do espectáculo.

Folla de sala
Ai, Mário Viegas! Ai! (Primeira parte)
O mundo son as persoas
Por Afonso Becerra de Becerreá (dramaturxia e dirección)

O mundo son as persoas. O mundo somos nós. E diso trata o teatro no que nos reflectimos. Entre esas persoas hai, quizais, algunhas excepcionais, ou quizais cada persoa é unha excepción, só hai que coñecela. Mais isto non é fácil. Nunca o foi, e agora parece aínda menos, debido ao illamento que fomentan as pantallas e as horas de vida mergulladas no mundo dixital e na actividade compulsiva (producir/consumir).

Falando de persoas, cando coñezo a Célia Guido Mendes (directora deste Centro Cultural Portugués en Vigo), xorde desde o primeiro día o nome de Mário Viegas (1948-1996). Non sabía quen era aquel fenómeno que, nalgún momento, cruzouse na vida da Célia. O que ela me contou del, e a forma en que mo contou, despertou a miña curiosidade polo Mário. Preguntei entón a Miguel Martins, nas miñas idas e voltas ao Festival de Teatro de Almada, e de novo vin aparecer no seu rostro e nos seus ollos unha expresión semellante á da Célia ao falar de Mário Viegas.

Miguel comezou a súa carreira artística de adolescente participando en Peço a palavra, programa televisivo portugués xa icónico, como Mário Viegas. Tamén preguntei a Teresa Cayolla Porto, viúva de Carlos Porto, dramaturgo e crítico teatral, e vin novamente como se iluminaba o seu rostro ao falar del. Todas as persoas que coñeceron Mário Viegas contáronme cousas incríbles e marabillosas.

O 1 de abril de 1996, Día das Mentiras, faleceu Mário Viegas, aquel artista teatral inclassificable, brillante e provocador, que dá nome a unha das salas do Teatro São Luiz, en Lisboa. En 2026 cumpriranse trinta anos do seu falecemento físico, pero a lenda continúa, e Eu.Experimento quere celebrala. A figura de Mário Viegas e todo o que a rodea resulta moi atractiva. Inspirámonos nos seus textos, imaxes e vídeos, e en Contos do Gin-Tonic, de Mário-Henrique Leiria, descubrindo o mundo a través dun humor ás veces surrealista, entre soño e pesadelo.

No laboratorio de Eu.Experimento, desde mediados de setembro ata o 18 de decembro de 2025, xogamos cos Contos do Gin-Tonic, descubrindo que cada un era un riso e un ai, unha graza e unha desgracia, un sorriso e un lamento. Por iso, pecharemos esta primeira parte da homenaxe a Mário Viegas con Cantiga dos Ais, de Armindo Mendes de Carvalho, ao estilo da nosa estrela.

Antes da Cantiga dos Ais, representarase os seguintes Ais teatrAIS:

• “Pôr-do-Sol”, con Ana Sousa, reflexionando sobre os límites entre imaxinación, pesadelo e traballo.
• “Carreirismo”, con Ernesto Luís e Carmen Lois, con colaboración de Ana Sousa e Nuria Otero, ironizando sobre as carreiras do ladrón que acaba xefe da policía.
• “Noivado”, con Nuria Otero e Ernesto Luís, abordando un amor máis miúdo que cego.
• “Medicina Tropical”, con Carmen Lois e Ana Sousa, metáfora grotesca sobre a busca dunha solución perfecta ás nosas “doenzas”.

Ai, Mário Viegas, Ai! é un gin-tónico teatral inspirado no xenio de Mário Viegas, interpretado por un pequeno elenco internacional:

• Ana Sousa, alumna Erasmus da Licenciatura en Teatro do Politécnico de Coimbra.
• Ernesto Luís, alumno Erasmus da Licenciatura en Artes Escénicas da Universidade Pedagóxica de Maputo, Mozambique, co Profesor Doutor Félix Bruno Mambucho.
• Carmen Lois e Nuria Otero, actrices galegas do Eu.Experimento.
• Afonso Becerra de Becerreá, aprendiz de teatro, descubrindo xunto con Mário Viegas que o mundo son as persoas e que o teatro somos nós.