A Movida retoma o coloquio 'A Movida Literaria' cunha homenaxe ao Hematocrítico

A inesperada e triste morte de Miguel López, o pasado 27 de novembro fixo que a A Movida e a Deputación de Pontevedra pospuxeran o segundo coloquio integrado no ciclo ‘A Movida Literaria’ no que se ía falar sobre literatura infantil e xuvenil en Galicia e no que ía participar a súa parella Ledicia Costas. Agora retómase a programación cun coloquio en homenaxe ao escritor nado na Coruña, quen dedicou boa parte da súa vida a escribir libros para nenos. Os escritores María Reimóndez, Marcos Calveiro e Manuel Esteban reconstruirán o universo do Hematocrítico a través dos seus enxeñosos textos, nun sentido acto que servirá para pechar un “tróspido” 2023.

A Movida Literaria xorde dos actos de celebración do quinto aniversario do medio cultural de referencia en Vigo, A Movida. Entre as diferentes actividades que a revista organizou durante este 2023 inclúese a publicación da revista número 50, un relato compartido escrito por algunhas das mellores plumas do país, todas elas ligadas a Vigo: Ledicia Costas, Pedro Feijoo, María Reimóndez, Domingo Villar, María Xosé Porteiro, Marcos Calveiro, Francisco Castro, Rexina Vega, Manuel Esteban e Inma López Silva. Estes escritores son os que participan destes dous coloquios, de acceso libre e gratuíto: o primeiro, celebrado o pasado 14 de novembro sobre novela negra e social en galicia; e o segundo, o do próximo xoves 28 de decembro, no que falaremos de literatura infantin e xuvenil en Galicia e no que recordaremos ao Hematocrítico. O evento terá lugar ás 19:30 na Sede da Deputación en Vigo (Eduardo Chao, 17).

Xoves 28 de decembro – Literatura infantil e xuvenil en Galicia (homenaxe ao Hematocrítico)

Marcos Calveiro
María Reimóndez
Manuel Esteban