A ONG Beyond Suncare e Afundación, inauguraron o pasado xoves ás 19.00 h na Sede Afundación de Vigo a exposición «Iguais baixo o sol». A mostra, que pon o foco na vida das persoas con albinismo en África subsahariana, poderá visitarse ata o 20 de xuño, de luns a sábados de 17.30 a 20.30 h. Na inauguración estiveron presentes Ana Botas, delegada de Beyond suncare Galicia; Paloma Vela, coordinadora adxunta da área de Cultura de Afundación e Yolanda Aguiar, concelleira de Benestar Social. A produción da exposición fotográfica «Iguais baixo o sol» contou coa colaboración da Fundación Humanitaria dos Rotarios Españois. O seu compromiso permite que historias de superación e dignidade crucen fronteiras para sensibilizar á sociedade sobre unha realidade tan invisible como urxente.

Máis aló do estigma

A través dunha coidada selección de retratos, a exposición ofrece unha mirada humana ao impacto do albinismo: dende o estigma social ata as barreiras de saúde. Organizada pola ONG Beyond Suncare, a mostra revela a forza de resiliencia en países como Malaui ou Uganda, onde a falta de protección solar e a desinformación son os maiores desafíos.

«A exposición invita ao público a mirar sen prexuízos e a deixarse conmover por historias que son un chamado á acción», explica Mafalda Soto, fundadora e directora da ONG. A ONG Beyond Suncare traballa en Malawi, Uganda ou a República Democrática do Congo para previr o cancro de pel prematuro e contribuír a reducir a desinformación existente.