O Mercado de Arte e Creatividade MONA regresa a Vigo do 19 ao 22 de agosto coa súa undécima edición, unha cita que busca achegar a creación artística ao público dun xeito directo e afastado dos espazos expositivos convencionais. Durante catro días, a planta baixa do Centro Comercial Gran Vía de Vigo reunirá a máis de 40 artistas e creadores, con máis dunha decena de expositores diferentes en cada xornada.

O mercado poderá visitarse en horario partido, de 11:30 a 14:30 e de 16:30 a 20:30 horas, na planta 0, xunto ao acceso da rúa Miradoiro. A entrada será gratuíta, polo que calquera persoa que pase polo centro comercial poderá achegarse, descubrir os postos e coñecer de preto o traballo dos artistas.

A variedade será unha das claves desta edición. Entre os postos poderán atoparse ilustracións, acuarelas, pintura acrílica e ao óleo, debuxo realista, arte dixital, manga, cómic, cerámica, xoiería e bixutería artesanal, ademais de artesanía en madeira, macramé, téxtil, papelería, deseño gráfico, prints, láminas, pósteres ou stickers. Tamén haberá propostas menos convencionais, como creacións en 3D pintadas a man, pezas de upcycling ou velas artesanais.

MONA pretende ser algo máis que un mercado no que mercar obras ou produtos artesanais. Unha das particularidades da proposta é a posibilidade de coñecer directamente ás persoas que están detrás de cada creación, conversar con elas e descubrir como traballan, que técnicas empregan ou que dificultades existen detrás de cada peza. Deste xeito, o público pode achegarse ao proceso creativo e non só ao resultado final.

A súa directora, a ilustradora e deseñadora gráfica Larissa Lyra, tamén impulsora do Vintax Market, define precisamente MONA como un proxecto creado para facer que a arte apareza no medio da vida cotiá, mesmo cando non se está buscando. A elección dun centro comercial responde a esa intención de colocar ilustracións, pinturas, cerámica ou deseño nun lugar polo que pasan diariamente miles de persoas e favorecer así encontros inesperados entre os artistas e o público.

A resposta dos propios creadores tamén amosa o crecemento da iniciativa. Para participar nesta undécima edición presentáronse 65 solicitudes en apenas tres días e medio, das que finalmente se seleccionaron máis de 40 propostas que se repartirán ao longo das catro xornadas.

O mercado mantén ademais unha relación estreita co Gran Vía de Vigo, escenario de boa parte da súa historia. Alí celebráronse a primeira, segunda, cuarta, quinta, sétima, oitava e décima edición, mentres que outras convocatorias pasaron por La Contenedora e a terraza de A Póla. Nesta ocasión, MONA volve ao centro comercial para continuar coa súa intención de dar visibilidade ao talento artístico local ante un público amplo e diverso.

Ata a propia imaxe do mercado ten selo vigués: o seu símbolo combina o corpo da Mona Lisa coa cabeza dunha gaivota, unha referencia directa a unha das aves máis características da costa da cidade. Nas redes sociais de MONA tamén se pode consultar previamente o estilo dos participantes, ver algunhas das obras que levarán ao mercado e coñecer que artistas estarán presentes cada un dos catro días.

HORARIO: De 11:30 a 14:30 e de 16:30 a 20:30 horas