Exposición ” 100/SEM ARTISTAS BRASILEIROS EM CARTAZ” abrirá as súas portas o 28 de xuño de 2025 na Galería Apo’strophe.arte.

Este proxecto representa un intercambio cultural sen precedentes entre Brasil e Galicia, cunha exposición xemelga que se inaugurará simultaneamente en Río de Janeiro con obras de 100 artistas galegos. A mostra, organizada polo colectivo brasileiro Imaginário Periférico, reúne obras de cen artistas contemporáneos que reivindican a periferia como territorio de creación viva, crítica e poética.

A exposición inclúe un gran panel colectivo de obras en papel, unha mostra de videoarte inmersiva e unha rica programación de actividades paralelas como charlas, debates e performances de poesía e música.

A iniciativa, organizada por André de Oliveira (poeta e xestor cultural brasileiro residente en Vigo), Raimundo Rodriguez (artista recoñecido polo seu traballo con materiais efémeros e temáticas sociais) e Sara Pérez Bello (directora da Galería Apo’strophe), representa un fito no diálogo cultural entre Brasil e Galicia.