Vigo acollerá do 19 ao 23 de novembro a exposición colectiva Arte para Mauri.
Unha proposta que unirá a arte e a creación contemporánea de 45 artistas galegos e estatais coa solidariedade. O obxectivo non é outro que recaudar fondos para Mauri, o neno vigués afectado pola Síndrome de Alexander. Unha enfermidade xenética ultrarrara, neurodexenerativa e sen tratamento curativo, pero con proxectos de investigación en marcha que avanzan cara a un posible tratamento.

A mostra poderá visitarse na sala Apos’trophe do Centro Comercial Praza Elíptica e reunirá obras de 45 artistas de todo o territorio estatal que quixeron sumarse de maneira altruísta doando pezas de pequeno formato para a súa venda solidaria. Todos os ingresos obtidos destinaranse integramente a impulsar proxectos de investigación orientados a avanzar cara a un posible tratamento para o pequeno Mauri, de 3 anos. Ademais de ser unha oportunidade única para coñecer de preto a obra orixinal dalgúns dos nomes máis destacados da arte contemporánea galega e española, a exposición aspira a converter a arte nun motor real de apoio á ciencia, a Mauri e á súa familia.

“ARTE PARA MAURI”, UNHA FERRAMENTA DE IMPACTO SOCIAL

Durante a inauguración e a clausura, boa parte dos artistas participantes compartirán co público as súas motivacións para colaborar nesta iniciativa, na que a creatividade se converte nunha ferramenta de impacto social.

Entre os nomes que integran a exposición figuran artistas da talla de:
Roberto Alonso, Bego Amare, Carla Andrade, Tamara Baz, Iñigo Beristain, Juan Bosco, Rocío Bueno, Abi Castillo, Martutxa Casares, Andrea Costas Lago, Tamara de la Fuente, Roberto de la Torre, Puri Díaz, Eva Díez, Thibaud Dupuy, María X. Fernández, Lula Goce, Elena Gómez Dahlgren, Antonio Gutiérrez, Elena Fernández Prada, Xabier Fernández, Nuria Figueiredo, Ana Fresco, Peri Helio, Jacinto Lara, Jorge Lens, Ruth Lodeiro, Din Matamoro, Monika Molenda, Joan Morera Arbonés, Rosa Neutro, Carme Nogueira, Alejandro Novoa, Belén Padrón, Francisco Pazos, Luis Pérez Calvo, Ignacio Pérez Jofre, Bea Polo Iañez, Iván Prieto, Fran Remiseiro, Silverio Rivas, Miguel Vidal, Alicia Valiño, Iria Vázquez e Mark Zlick.

Tanto a inauguración como o peche da exposición contarán coa colaboración desinteresada de Cervezas Banda, Pastelería Kopenacamos e Massini.

Unha cura para Mauri

Unha cura para Mauri é un proxecto solidario que xurdiu en Instagram en 2025 tras o diagnóstico do pequeno. O seu propósito é visibilizar a enfermidade e apoiar á familia e aos amigos de Mauri na recadación de fondos para o tratamento experimental e a investigación científica necesaria para avanzar cara a unha posible terapia, valorada entre 500.000 e 1.000.000 de euros.

Desde finais do ano pasado son moitas as persoas que se sumaron á causa e puxeron en marcha todo tipo de iniciativas para axudarlles a reunir o diñeiro que poida darlle unha esperanza ao pequeno. De forma complementaria, a familia de Mauri creou hai só uns meses a Asociación Española de Enfermos de Alexander, unha entidade sen ánimo de lucro que traballa para acompañar ás familias afectadas, promover o coñecemento sobre a enfermidade e establecer vínculos con equipos científicos nacionais e internacionais especializados nesta patoloxía.

A recadación xerada por “Arte para Mauri” contribuirá directamente a estas liñas de traballo, co obxectivo común de acelerar o desenvolvemento dun tratamento para o Síndrome de Alexander.

DATOS DA EXPOSICIÓN

Inauguración: Mércores, 19 de novembro, de 19:00 a 21:00 horas.
Clausura: Domingo, 23 de novembro, de 12:00 a 14:00 horas.