Évame Oroza prepara unha escultura de Carlos Oroza mirando ao mar de Vigo
Os xardíns do Paseo das Avenidas, no Náutico, converteranse nun novo espazo de referencia para a cultura viguesa coa instalación dunha estatua dedicada ao poeta Carlos Oroza. O proxecto, que foi presentado hoxe no mesmo enclave onde se situará a obra, é froito de case dous anos de traballo impulsados pola asociación cultural Évame Oroza co apoio institucional da Xunta de Galicia, a Deputación de Pontevedra e a Autoridade Portuaria de Vigo.
Despois de moitos anos de intentos, o poeta Carlos Oroza terá unha escultura en Vigo. A escultura, que se prevé instalar no mes de novembro, será unha figura de bronce a tamaño natural creada polo escultor Sergio Portela e fundida no obradoiro de Cuqui Piñeiro. A peza situarase sobre unha peana de granito galego, acadando unha altura total de aproximadamente 185 centímetros. A obra, que estará mirando á ría, representará a Oroza na súa tradicional postura ao camiñar, cos brazos detrás das costas e un libro nas mans.
Máis alá da homenaxe á figura de Oroza, o obxectivo principal desta iniciativa é crear un escenario cultural permanente no que a poesía e a palabra ocupen un lugar protagonista. Este punto de encontro estará aberto á celebración de recitais poéticos, presentacións de libros e diversas actividades culturais nos xardíns do Náutico, cuxo espazo foi cedido pola Autoridade Portuaria.
Financiamento e participación cidadá
O orzamento do proxecto será asumido en dúas terzas partes pola Xunta de Galicia, a través da Dirección Xeral de Cultura, e pola Deputación de Pontevedra. Para cubrir a terceira parte restante, a asociación Évame Oroza puxo en marcha unha campaña de mecenado aberta a toda a cidadanía.
As persoas interesadas en colaborar poden realizar as súas achegas de calquera importe a través da páxina web da entidade (https://evame.org/). Aquelas colaboracións a partir de 20 euros recibirán diferentes recompensas en función da contía doada.
Sobre Carlos Oroza
Carlos Oroza, nado en Viveiro en 1923, foi un dos poetas máis singulares da literatura contemporánea, recoñecido pola súa oralidade radical e unha actitude vital próxima á contracultura e ao movemento beat. Tras décadas de bohemia no Madrid do Café Gijón e unha etapa creativa fundamental en Eivissa —onde a súa poesía se transformou e gañou en ritmo—, Oroza vinculouse de xeito definitivo con Galicia, escollendo Vigo como a súa cidade de acollida.
Nesta etapa viguesa, o autor consolidou o seu prestixio e recibiu importantes recoñecementos como o de Vigués Distinguido ou o Premio Laxeiro, mentres os seus versos quedaban gravados permanentemente no chan do quilómetro cero da cidade. O poeta faleceu en Vigo no ano 2015 aos 92 anos, deixando tras de si unha obra que sempre defendeu como un acto de comunicación directa e oral.
