ARRIBADABAIONA
REVISTA FEBREIRO

Dous festivais de cine vigueses abren as súas convocatorias

Dous dos festivais de cinema da nosa cidade, o Galician Freaky Film Festival (GFFF) e o Festival de Cine Inclusivo (VIIFF), xa teñen as súas convocatorias abertas para recibir os filmes que se proxectarán nas súas edicións deste ano.

GALICIAN FREAKY FILM FESTIVAL

Membros do equipo do GFFF na última edición | P. Vázquez

Desde o 18 de xaneiro ata o 12 de xuño o Galician Freaky Film Festival abre os buzóns para a recepción de filmes que formarán parte da súa sétima edición. A inscrición é gratuíta é pode facerse a través do formulario dispoñible na súa web , ou a plataforma Festhome. No 2022, o GFFF recibiu preto de 650 filmes dos cinco continentes, cos que construiu unha sorprendente escolma do máis destacado do audiovisual freak.

A convocatoria que lanza o Galician Freaky Film Festival cada ano está aberta á participación de cineastas profesionais ou afeccionados de calquera parte do mundo, sen límite de traballos por autor, sempre e cando foran producidos en 2021 ou despois. Só se admitien curtametraxes, que deben ter unha duración máxima de 30 minutos e encaixar nalgún dos estilos do festival: terror, fantasía, ciencia ficción, comedia ou freak.

Tamén poderán presentarse filmes dirixidos a público infantil que queiran formar parte do Pequefreak, a xornada que, desde hai dous anos, o certame dedica en exclusiva a  mergullar o público miúdo na cultura freak e infundir a paixón pola sétima arte nas xeracións máis novas.

Os filmes seleccionados pasarán a formar parte da sección oficial da sétima edición do Galician Freaky Film Festival, que se celebrará entre o 22 e o 30 de setembro, tanto presencial como online, e optarán a algún dos 8 premios que o certame reparte, outorgados polo público e por un xurado especializado. Esta será a primeira edición na que os gañadores das tres categorías máis destacadas do certame (Gran Premio GFFF á curtametraxe máis freak, Premio Olimpo dos Freaks á curtametraxe máis aplaudida e Premio Olimpo dos Pequefreaks) reciban un premio en metálico de 200€, ademáis da característica estatuíña do Dinoseto decapitado.

FESTIVAL DE CINE INCLUSIVO

Algúns dos galardoados da última edición do VIIFF | P. Vázquez

O Festival de Cine Inclusivo de Vigo abre o prazo de recepción de curtametraxes, longametraxes, webseries e documentais ata o 17 de maio. A VIII edición, organizada pola asociación AGAIN, celebrarase do 17 ao 21 de outubro. Como novidade este ano o festival contará cunha sección de curtas arredor da diversidade sexual.

Banner A Movidiña

A temática das curtametraxes é totalmente libre, podendo ser tanto de ficción como de non-ficción. No caso dos documentais, as longametraxes de ficción e as webseries a temática virará arredor da inclusión co obxectivo de visibilizar todos aqueles proxectos que toquen de maneira substancial a diversidade funcional, sexual, xeracional, económica ou cultural e o que a rodea.

Todos os premiados recibirán unha estatuíña conmemorativa e un premio en metálico. Establéncense as seguintes categorías e premios que serán otorgados por un xurado profesional: o premio á mellor longametraxe de ficción recibirá 600 euros e estatuíña, o premio ao mellor documental recibirá 600 euros e estatuíña, o premio á mellor curtametraxe de ficción recibirá 400 euros e estatuíña e o premio á mellor curtametraxe documental recibirá 400 euros e estatuíña. O público escollerá os dous premiados restantes: o premio á mellor webserie (votación online) recibirá 200 euros e estatuíña e un premio do público entre todas as pezas a concurso valorado en 300 euros e estatuíña.

A duración máxima das obras presentadas será de 25 minutos no caso das curtametraxes e de 180 minutos cando se trate de documentais e longametraxes de ficción (títulos de crédito incluídos en ambos os casos). A inscrición é gratuíta. As obras que se presenten serían realizadas e/ou estreadas preferiblemente con posterioridade ao 1 de xaneiro de 2022. As bases pódense consultar na web do Festival, onde os interesados poden inscribirse para participar.