Dos Nudos: Catro mans, dous nós

Publicado o por

Dos Nudos é unha marca local de alfombras e obxectos téxtiles fabricados mediante a técnica do tufting onde combinan cores imposibles, orixinalidade, enerxía.

Caterina Cabo, licenciada en Arte, e Agustín Fagiano, deseñador gráfico, son as dúas pezas de Dos Nudos, unha marca local de alfombras e obxectos téxtiles fabricados mediante a técnica do tufting, unha maneira de bordar moi particular cunha pistola eléctrica. O proceso de creación combina a sensibilidade artística do artesanal e a tecnoloxía do deseño, para que cada alfombra sexa unha obra feita á man que reflicta dedicación, paciencia e amor polo oficio. Dos Nudos xorde da necesidade de facer algo creativo en conxunto que poida alimentar a curiosidade e xerar sinerxías entre ambos en relación co mundo exterior, coa intención de levar a arte e o deseño contemporáneo a espazos cotiáns.

MILLO VERDE

Combinacións de cores imposibles, orixinalidade, enerxía; sardiñas, froita, sifóns e xeometrías varias… O imaxinario de Dos Nudos é infinito para encher a casa de vida. Con cada peza, Caterina e Agustín convídannos a redescubrir a beleza da arte do feito á man coa técnica do bordado á máquina, na cal os materiais nobres e a atención ao detalle se unen para contar historias e experimentar sensacións. Xogando con texturas, formas e cores, obxectos que na súa materialidade orixinal son duros ou robustos, no imaxinario de Dos Nudos tornan flexibles e brandos para faceren do mundo unha realidade acariciable.

Se, ademais de mercar unha das súas alfombras, queremos aprender a facelas, Dos Nudos imparte talleres en Vigo, Cangas e arredores, abrindo así a súa porta á comunidade e impulsando a cor e o handmade a outro nivel.

@dosnudosestudio | dosnudos.com

Estela Gómez
Redactora

The following two tabs change content below.
My Instagram profile

Estela Gómez

Estela naceu no 1992 preto do mar. É filóloga, escritora e correctora literaria, amiga do analóxico, a cultura e a moda vintage. No 2021 foi unha das dez escritoras seleccionadas da Residencia Literaria da Cidade da Cultura dirixida por Javier Peña. No 2025 publicou a súa primeira novela. Poderás atopar a Estela na biblioteca, no cine, no museo, no teatro, nun concerto ou no centro da cidade lendo un libro ao sol.

Publicaciones relacionadas:

  1. Catro escritores galegos lanzan ‘Oito mans’, unha proposta literaria interactiva
  2. Ars Canis: boas mans para os de catro patas
  3. Victoria García: «É necesario que os pequerrechos nos vexan con libros nas mans”
  4. Catro por catro