Documentais, podcasts, libros e actividades arredor de Begoña Caamaño polo Día das Letras Galegas

Este domingo 17 de maio celébrase o Día das Letras Galegas, este ano dedicado á xornalista e escritora viguesa Begoña Caamaño. Imos recompilar algúns dos actos máis relevantes que van ter lugar na nosa cidade arredor da súa figura, así como documentais, podcasts e libros que nos axuden a coñecer mellor a súa vida, obra e pensamento.

DOCUMENTOS AUDIOVISUAIS

• Begoña Caamaño: navegar no pracer do azul, é o documental da protagonista do Día das Letras Galegas 2026, producido pola Real Academia Galega e dirixido por Damián Varela Pastrana e Alba López Álvarez.

• A RAG tamén produce unha serie de videopodcasts conducidos por Alba Mancebo co título Colchas de voces arredor da figura de Caamaño. As primeiras convidadas foron as músicas viguesas Fillas de Cassandra. A seguinte convidada será a escritora Antía Yáñez.

• Para o público infantil e xuvenil a RAG preparou unha obra de teatro escrita por An Alfaya e ilustrada por Laura Romero, onde Caamaño vive emocionantes aventuras canda as protagonistas das súas novelas. A proposta conta con varias actividades interactivas.
• É o tempo de Begoña é unha serie de reels para redes sociais nos que Alba Mancebo achega información sobre a homenaxeada en vídeos breves.
• O Colexio Profesional de Xornalistas de Galicia tamén preparou unha serie de podcasts arredor de Begoña Caamaño con título Poñer a voz. É un relato sonoro en cinco capítulos que atravesa a súa vida, desde a súa infancia e xuventude en Vigo, onde prende a paixón por contar historias, ata a súa implicación vital no feminismo, no coidado da lingua, no antimilitarismo e na defensa dos medios públicos.
• A Asemblea de Mulleres do STEG (Sindicato de Traballadoras do Ensino Galego) celebra o legado de Begoña cun podcast de tres episodios orientado a facilitar a tarefa a mestres e mestras.

LIBROS

Como é habitual cada ano, as diferentes editoriais galegas publican diversos libros tanto da como sobre a autora homenaxeada.

• A Editorial Galaxia publica cinco libros arredor de Caamaño: Bego e o mundo do reves, de Iria Collazo; A nena que perdeu un zapato na lama, de Ramón Nicolás; Biografía de Begoña Caamaño, de Ana Romaní e María Xesús Nogueira; Begoña Caamaño, o transgredir das ondas, de Paula Carballeira; e Begoña Caamaño, xornalismo para a cidadanía, de María Xosé Porteiro; e dous da súa autoría: Circe ou o pracer do azul e Morgana en Esmelle.
• A Editorial Xerais optou por dúas biografías dirixidas ao público infantil e xuvenil: Os fío de Begoña, de Eva Mejuto e Nuria Díaz; e Begoña e o pracer da amizade, de Beatriz Maceda.
• Através Editora publicou a biografía Begonha Caamanho, uma das nossas, de Charo Lopes, Lara Rozados e Isaac Lourido.
• Ir Indo tamén optou polo formato biografía con Begoña Caamaño, xornalista e escritora, de Estefanía González.
• Edicións Embora propón un título ilustrado por Nerea Gómez e escrito por Icía Varela e Xosé Manuel Varela que leva por título o nome da escritora.

EVENTOS EN VIGO

• Xoves 14 ás 20:00 h en Évame Oroza: Conferencia ‘Begoña Caamaño. Un xeito de entender e estar no mundo’. Durante a conferencia, María Xesús Nogueira realizará un percorrido polas diferentes facetas da biografía e da obra de Begoña Caamaño, achegando ao público o perfil dunha muller que concibiu o feminismo e a literatura como unha forma de entender e estar no mundo.
• Venres 15 ás 19:00 h na Praza da Industria: Festa das Letras Galegas organizada pola asociación As da Industria. Haberá unha actuación e obradoiro de regueifa sobre Begoña Caamaño con Branca Trigo Cabaleiro e Silvia Villar, unha foliada co grupo de pandereteiras e bailes de serán de ‘A Morada’, postos de exposición e venda de libros coas librarías do barrio Sequeiros e A Klandestina e paneis explicativos sobre a figura da escritora Begoña Caamaño.
• Sábado 16 ás 16:00 h en A Morada: Homenaxe a Begoña Caamaño. Haberá lectura de fragmentos da súa obra.
• Sábado 16 ás 20:30 h no Mar de Vigo: Concerto das Letras Galegas. A artistas mosense Uxía, unha das voces máis salientables da música galega e, ademais, amiga de Caamaño, será a encargada de poñer a banda sonora nunha xornada tan especial. Moitas das cancións que interpretará están inspiradas en textos de Begoña, que aparecen recollidas no librodisco de próxima publicación Indómitas. 9 ondas a Begoña Caamaño.
• Domingo 17 ás 12:00 h na Porta do Sol: actividades do Concello de Vigo. O acto central terá lugar o 17 de maio ás 12:00 horas na Porta do Sol, cunha lectura do bando a cargo do director da ETRAD, Anxo Pintos, seguida de lecturas de textos da autora homenaxeada e unha actuación musical da propia escola. Ese mesmo día celebraranse actuacións de regueifas en Alcabre, Matamá e Valadares. A programación continúa os días 18, 19 e 20 con concertos da ETRAD na rúa Príncipe, fronte ao MARCO. Ademais, o 22 de maio terá lugar no parque de Castrelos unha nova edición do Correlingua no que participan varios centros educativos. O sábado 23 celebrarase unha nova actuación de regueifas, esta vez en San Miguel de Oia.