Galaxia

Descúbreas busca talento feminino na industria musical para o seu programa formativo

Descúbreas, o programa pioneiro de fomento do talento feminino na industria musical dirixido a mozas de 16 a 30 anos, pretende dar protagonismo á formación e á creación de redes de traballo no sector musical. As inscricións para o programa de mentoría están abertas ata o venres 11 de marzo.

Gala da primeira edición de Descúbreas, no castelo de Soutomaior | Cedida

O programa Descúbreas, promovido pola Deputación de Pontevedra en colaboración con Regalamúsica, arrinca a súa segunda edición. A relevancia das escolas de música e doutras disciplinas relacionadas na formación das futuras artistas e profesionais da industria musical é un dos aspectos nos que se poñerá especial atención nesta edición. Así mesmo, os contidos da plataforma e dos diferentes eventos que terán lugar no marco deste programa tamén poñerán de relevo a importancia de impulsar xeración as redes profesionais de mulleres.

Banner A Movidiña

Ademais, volve incluír o seu programa de mentoring para o que se conta coas mulleres referentes na industria musical que participaron na anterior edición e ás que se sumarán outras profesionais de relevancia nacional e internacional. A primeira confirmación é a de Salomé Limón, produtora musical gañadora de 5 Latin Grammy e que traballou con artistas da talla de Andrés Calamaro, Paco de Lucía, Anoushka Shankar, Chick Corea, John Legend, Vampire Weekend, Enrique e Estrella Morente, entre outras artistas.

Descúbreas Mentoring trátase dun proxecto de empoderamento de nenas e mulleres no ámbito musical destinado a mozos de idades comprendidas entre os 16 e os 30 anos. A diferenza con respecto a outros programas de mentoring é que está enfocado a mozos que se están iniciando, pero demostran interese por ampliar os seus coñecementos neste sector e teñen aptitudes para desenvolver o seu proxecto artístico musical. As mentorías impartidas por mulleres referentes na industria musical son acompañadas doutras accións que achegan as ferramentas necesarias ás mozas para iniciar a súa andaina na industria musical, ademais de abrirlles a porta a novas vocacións máis técnicas ou de xestión no sector cultural. Raquel Seijo, xerente de Sweet Nocturna e expresidenta de Festivais de Galicia, Patricia Hermida, xerente de Dotbeat e copresidenta do International Music Managers Forum (IMMF) e a artista Wöyza, unha das mellores voces do rap e do R&B, son algunhas das mentoras da primeira edición e ás que se sumarán outras. As oito novas bolseiras do programa terán a oportunidade de gravar unha canción nun estudio con persoas de gran experiencia no mundo da produción musical. Tamén, terminarán este proceso de aprendizaxe cun videoclip filmado por un equipo audiovisual de profesionais de Regalamúsica.

Para ser seleccionadas na segunda edición, as interesadas deben ser residentes na provincia de Pontevedra e presentar a súa inscrición dispoñible na web de Descúbreas ata o venres 11 de marzo. Un equipo interdisciplinar de profesionais da industria musical valorará as aptitudes, talento, e sobre todo, tentará saber se é o momento adecuado para dar eses primeiros pasos.

X