CASAACUNHA

De portas abertas: colexios á vista

Todos os anos, decote por estas datas, o aluvión de información que lles chega ás familias para elixir un colexio pode resultar moi atafegante. Para empezar, deberíamos rachar coa idea de buscar o centro coas mellores cifras de resultados e, en troques, decidirnos a dar coa escola máis axeitada para a nosa rapazada.

Unha boa opción para escoller unha institución educativa que encaixe coas necesidades que teñamos como familia é asistir ás xornadas de portas abertas que nos permiten coñecer de primeira man cada colexio. Ningunha visita virtual ou entrevista telefónica se pode comparar a camiñar polas instalacións dun centro e sentir o que transmite ese lugar nunha primeira impresión presencial. As referencias doutros proxenitores ou de antigos alumnos tamén poden ser de gran relevancia para indagar sobre a calidade técnica e humana de cada centro de ensino.

Banner A Movidiña

As visitas máis recomendables son as que se fan en horario lectivo, para ver como responde o centro a pleno funcionamento. Inmersos nas instalacións, podémonos fixar na disposición das aulas, nas dimensións, no equipamento, os traballos que penduran das paredes ou mesmo na orde e a limpeza de cada recanto. As áreas de recreo deberían ser amplas e estar dotadas de zonas verdes e luz natural. Ademais de preocuparnos polas aulas ou polas actividades extraescolares, é importante que teñamos en conta os tempos de descanso, que son imprescindibles na infancia.

Alén do proxecto educativo e a metodoloxía a seguir, un indicador clave da verdadeira filosofía do colexio é preguntar como se abordan os problemas de conduta; se se impoñen sancións, saber en que consisten. O máis adecuado é que os principios ideolóxicos do centro educativo coincidan cos da propia familia. Debemos tomar tempo para dar coa escola que se poida ver como unha prolongación dos valores promovidos desde o fogar.

Lourdes Tomé
Redactora

The following two tabs change content below.
Educadora Infantil e Educadora Certificada en Disciplina Positiva pola Asociación Española e Americana. É ademais nai de dous pequenos que, segundo di, son os que a fan medrar e aprender cada día. Encántalle a natureza e viaxar aínda que a súa maior paixón son os nenos e a infancia como demostra no seu blog Little Scaler, onde aposta pola crianza respectuosa e amosa que criar sen berros e sen castigos e posible.