Curtametraxes, feridas de látex e David Bowie na sexta edición do Pequefreak

Publicado o por

A canteira freak do Galician Freaky Film Festival, o festival Pequefreak, volve á carga do 19 ao 20 de setembro na Plaza Elíptica. A cita quere encandilar ao público infantil con 24 curtametraxes de 21 países, dous obradoiros de efectos especiais e a proxección de Dentro del laberinto polo seu 40 aniversario.

Presentación do Pequefreak con David Bowie

O Galician Freaky Film Festival volve reservar un espazo para os pequenos da casa coa sexta edición do Pequefreak, que se celebrará os días 19 e 20 de setembro na Plaza Elíptica, nas sedes de Apo’strophe.arte e Cines Tamberlick.

REVENIDAS

A Sección Oficial reunirá 24 curtametraxes procedentes de 21 países, seleccionadas para provocar risas, sorpresa e algún que outro arrepío. As películas estarán divididas en dúas categorías: Todos os Pequefreaks, para todas as idades, e Pequefreaks +7, para maiores de sete anos.

Fóra da sala de cine regresa un dos clásicos do certame: o obradoiro de efectos especiais impartido por Ricardo Spencer, que despois de encher prazas en todas as edicións, contará con dúas convocatorias: o sábado 19 e o domingo 20 pola mañá. Os participantes, que deben ser maiores de 7 anos, aprenderán técnicas profesionais para crear feridas, trucaxes con látex e sangue, que poderán aplicar tanto ás súas futuras producións audiovisuais como ás caracterizacións de Samaín e Entroido.

O programa completarase coa proxección de Dentro del laberinto, a película de Jim Henson que este ano celebra o seu 40 aniversario. O filme, protagonizado por David Bowie e Jennifer Connelly e con guión de Terry Jones, de Monty Python, fará aos adultos reencontrarse cun dos grandes clásicos do cinema fantástico e descubrir o universo do Rei dos Goblins ás novas xeracións. 

Como na sección para adultos, o Pequefreak tamén ten os seus premios: O Premio Olimpo dos Pequefreaks e o Gran Premio Pequefreak. O primeiro distingue a mellor curtametraxe segundo o voto do público máis novo. Durante as sesións, os Pequefreaks poderán facer valer a súa opinión a golpe de aplauso, recollidos a través do aplausómetro do festival. Canto máis se aplauda, máis puntos para a curtametraxe. 

Para decidir o Gran Premio Pequefreak, o festival está na procura dos integrantes do Honorable Xurado Pequefreak 2026: tres nenos ou nenas de entre 9 e 11 anos que poderán ver as 24 curtametraxes con antelación e votar as súas favoritas. A convocatoria está aberta a través do formulario na web do festival ata o 23 de agosto.

As entradas están dispoñibles para cada unha das sesións na web do Galician Freaky Film Festival. Quen queira vivir o Pequefreak ao completo poderá optar polo abono VIPF (Very Important Pequefreak), que dará acceso aos catro bloques de curtametraxes da Sección Oficial e á proxección de Dentro do labirinto; ademais de poder lucir unha chapa exclusiva. 

The following two tabs change content below.

Paula Cermeño

Licenciada en xornalismo pola USC, pero a súa principal ocupación é viaxar. Mentres aforra para dar a volta ao mundo, traballa como redactora e xestora cultural. Gústanlle os libros, o audiovisual, o teatro e o rock and roll, por iso é doado atopala en moitos dos saraos vigueses.

Publicaciones relacionadas:

  1. Volve o Pequefreak con máis días, máis curtametraxes e un xurado infantil
  2. O GFFF busca os mellores filmes underground para a súa sexta edición
  3. The Wild Cinema abre a convocatoria para participar na súa sexta edición
  4. Mar, gastronomía, música, deporte e máis, na sexta edición do Vigo SeaFest