Caixiña de Ritmos propón un verán de baile, música e creatividade
A escola de baile Caixa de Ritmos volve celebrar este verán o seu campamento urbano Caixiña de Ritmos, unha actividade dirixida a nenos e nenas que combina baile, música, artes plásticas e propostas de reciclaxe.
“Diversión, aprendizaxe e moito baile” é a proposta de Caixa de Ritmos para os nenos e nenas este verán. A escola de baile organiza un ano máis o campus urbano Caixiña de Ritmos, un campamento dirixido a nenos e nenas de 6 a 9 anos que se desenvolverá en Vigo entre o 6 e o 24 de xullo. A actividade combina formación artística e lecer a través da danza, a música e obradoiros creativos, cun enfoque tamén na reciclaxe e a conciencia ambiental.
O campus terá lugar en Caixa de Ritmos, situada no Calexón Canos 9, a carón do Teatro García Barbón. O horario principal é de 9:00 a 14:00 h, aínda que as familias poden ampliar o servizo de entrada e saída, con posibilidade de chegar desde as 8:00 e saír ata as 15:00 h mediante suplemento. A organización aposta por grupos reducidos, cun máximo de 12 participantes por grupo, co obxectivo de ofrecer unha atención máis personalizada.
A actividade principal é o baile, especialmente o achegamento a diferentes estilos de baile urbano como hip hop, house, breaking ou popping, ademais de danza jazz orixinal. A través do movemento corporal, introdúcense tamén conceptos musicais básicos e trabállanse disciplinas complementarias como o canto, a percusión corporal e o claqué. Segundo a organización, búscase favorecer “diversión, aprendizaxe e moito baile para gañar conciencia corporal, rítmica, psicomotricidade, capacidade de traballo en equipo e desenvolvemento da sensibilidade musical”.
Tamén se realizan actividades complementarias de artes plásticas centradas na reciclaxe, para fomentar a concentración e a creatividade, ao mesmo tempo que desenvolven unha conciencia medioambiental e adquiren estratexias para darlle nova vida aos obxetos vellos, fomentando a capacidade de resolución de problemas.
En canto aos prezos, establécense diferentes opcións segundo a duración: unha semana por 119 euros, dúas semanas por 218 euros e o programa completo de tres semanas por 297 euros . A organización ofrece ademais un desconto do 10% para irmáns e suplementos para o servizo de ampliación horaria. A reserva realízase mediante formulario dispoñible na súa web e teñen un número de Whatsaapp dispoñible para resolver dúbidas.
Paula Cermeño
Últimos posts de Paula Cermeño (ver todos)
- A Selección Galega de Fútbol Gaélico busca apoios para financiar a súa participación nos Xogos Mundiais - 5 Xuño, 2026
- Autobán convoca un premio ao mellor fanzine galego - 3 Xuño, 2026
- Caixiña de Ritmos propón un verán de baile, música e creatividade - 29 Maio, 2026
- Amigos de la Ópera presenta ‘Don Giovanni’ e outras dez actividades - 29 Maio, 2026
- ‘Oasis’, ‘Punto Nemo’ e ‘Ágata y Lola’ encabezan a programación do Festival de Series Ría de Vigo - 27 Maio, 2026