Astro Labia: nace un novo festival de música e poesía en Vigo
Os días 2 e 3 de xullo celébrase a primeira edición de Astro Labia, un festival que mestura poesía, indiepop e electrónica en dous espazos do centro de Vigo. Algúns dos artistas que poderemos ver son Yolanda Castaño, Belén Rumia, Lontras, ISGA Collective ou Marcos de la Fuente.
Vigo suma unha nova cita cultural ao seu calendario estival coa chegada de Astro Labia, un festival que combina indie pop, electrónica e poesía nun formato singular e accesible. A proposta celebrarase os días 2 e 3 de xullo en dous espazos céntricos da cidade, coincidindo coa semana da Feira do Libro, co obxectivo de tender pontes entre a creación literaria e a música en directo.
A programación arrancará o xoves 2 no antigo Aeroclub, o actual Vitruvia, cunha xornada que xa anticipa o espírito híbrido do evento. Sobre o escenario pasarán a cantante galega afincada en Berlín Rumia, coñecida polo seu indie pop de ton melancólico, e o poeta vigués Marcos de la Fuente, que presentará o seu proxecto As Cordas InvisíBeis, unha proposta que fusiona piano e poesía en galego. Ese mesmo día, o Café Vitruvia acollerá unha das citas máis destacadas: Idioma de Tinta, o espectáculo da poeta Yolanda Castaño —Premio Nacional de Poesía— xunto ao músico Isaac Garabatos, nun formato que leva a palabra poética ao directo musical.
O venres 3 de xullo, o festival trasladarase ao porto de Vigo, concretamente ao pantalán do Náutico, onde o mar será escenario e pano de fondo para tres concertos consecutivos. O trío vigués Lontras presentará o seu novo traballo, Caras no lume, mentres que o músico e produtor Belish achegará a súa proposta de electrónica indie con letras en catalán e galego. Como un dos pratos fortes da xornada, ISGA Collective estreará un novo proxecto baseado nos poemas de María do Carme Krukenberg, interpretados pola voz de Mónica de Nut e coa instrumentación de Isaac Garabatos.
O peche do festival terá lugar na Taberna do Náutico, cunha proposta máis festiva que incluirá cea e baile ao ritmo da sesión da DJ viguesa Santa Gertrudis.
Astro Labia preséntase así como un evento aberto a todos os públicos, pensado para desfrutar a pé, no centro da cidade e á beira do mar. Unha celebración da cultura contemporánea galega que reúne artistas locais e voces da diáspora nun encontro que convida a mirar ás estrelas sen saír de Vigo.