As obras dunha nova xeración de artistas instálanse no MARCO
Este xoves 5 de xuño o MARCO acolleu a presentación de Generación 2025, a vixésimo quinta edición dun proxecto da Fundación Montemadrid La Casa Encendida que difunde as creacións de novos talentos. A mostra permanecerá dispoñible ata o domingo 12 de outubro.
Generación 2025 forma parte de Generaciones, un programa que, anualmente, realiza unha selección de varias propostas artísticas propias de xóvenes residentes en España. O seu fin é por en valor aos artistas máis novos, proporcionándolles ferramentas de produción e posterior difusión. A día de hoxe, a súa ampla e prestixiosa traxectoria convertiuno nun referente nacional no panorama de creación artística máis recente.
Seguindo na liña de dar a coñecer aos gañadores e coa firme convicción de que mudar de espazo enriquece notablemente a mostra, Generación 2025 chega ao museo vigués este xoves. Pode visitarse ata o 12 de outubro no horario habitual do MARCO, contando coa presenza dun guía ás 18:00 h, na súa planta baixa, onde os novos espazos adáptanse por completo ás necesidades específicas de cada obra.
A selección do presente ano está composta por oito proxectos que comparten narrativas sobre futuros desexables e a IA como produtora de ficción. Así mesmo, mostra un forte interese pola oralidade, a voz e o canto, sen perder de vista á memoria e a historia do tempo. Os artistas son Tana Garrido Ruiz, Isabel Merchante, Mar Reykjavik, Elián Stolarsky, Javier Velázquez Cabrero e os galegos Álvaro Chior, Noela Covelo Velasco e Marina González Guerreiro. Entre estes nomes, cabe destacar a maioritaria presenza de artistas mulleres, das cales a metade estivo presente no acto de inauguración para falar das súas obras.
Concretamente, Elián Stolarsky explicou Aphantasia, unha instalación téxtil cosida a man e punta seca sobre metacrilato que evoca á memoria dos seus devanceiros fuxidos do nazismo; Marina González Guerreiro Lo que tarda un ______ en caer al ______, unha instalación de diversos materiais como ferro, cerámica esmaltada, madeira ou auga que cuestiona a concepción moderna do tempo preciso; e Noela Covelo Velasco a quien encuentra, partitura (ACh), un sistema sonoro constituído por un muro de madeira, altofalantes e a súa voz en bucle que permite percibir outras estruturas temporais.
