Arrancou a Feira do Livro do Porto, o paraíso da literatura lusa a menos de dúas horas de Vigo
Desde o pasado venres ten lugar nos Jardins do Palácio de Cristal, na cidade lusa do Porto, a súa popular Feira do Livro, fundada en 1930 e organizada desde 2016 pola Câmara Municipal do Porto. Poderemos visital ata o 7 de setembro, con entrada de balde.
Porto é unha cidade bastante frecuentada polos galegos, especialmente os do sur, pola súa proximidade xeográfica, a semellanza idiomática, a beleza da súas rúas e os diferentes plans de lecer que ofrece. Un deles é a Feira do Livro, que arrancou o pasado venres 22 de agosto e poderá visitarse nos Jardins do Palácio de Cristal ata o 7 de setembro.
Malia que compartan nome, pouco ten que ver coas feiras do libro galegas e, en especial, a viguesa: 130 casetas de librerías (de primeira e segunda man) e editoriais enchen de literatura o fermoso parque portuense. Para facernos unha idea, a feira máis grande de Galicia, a da Coruña, tivo en 2025 39 casetas. A de Vigo algo máis da metade, 21, e a de Santiago arredor de 17. A pesar do seu gran tamaño e afluencia de xente, é moito máis doado moverse entre casetas que na feira viguesa. Alén dos postos, hai numerosas actividades infantís, obradoiros, charlas, presentacións, sinaturas, concertos e mesmo unha zona onde comer e beber.
Ademais do propio desconto da feira, cada día hai un Livro do día que reduce o seu prezo ente un 30 % e un 50 %. O horario do evento é de 12:00 h a 21:00 h de luns a venres, de 12:00 h a 22:00 h os venres e de 11:00 h a 21:00 h os domingos. Podes consultar o programa completo premendo aquí. Para chegar ao Porto podemos utilizar o coche (sobre 1 h e 40 min), autobús (sobre 2 h 20 min) ou tren (sobre 2 h e 20 min) desde Guixar con trasbordo en Viana do Castelo.
Pablo Vázquez
Últimos posts de Pablo Vázquez (ver todos)
- O labirinto administrativo de Vigo: por que é tan difícil organizar un evento cultural no espazo público - 4 Xuño, 2026
- Álex Arnoso: «Non fixemos Vimbio como unha aposta comercial, senón porque nos apetecía» - 2 Xuño, 2026
- O documental sobre o actor vigués que compartiu pantalla con Clint Eastwood ou Kirk Douglas precisa axuda - 26 Maio, 2026
- Once espazos onde escoitar música en directo nos arredores de Vigo - 21 Maio, 2026
- Imaxinatea Lab Creativo propón un campamento no que desenvolver a creatividade - 14 Maio, 2026