CONCERTOS CASTRELOS
DIA DE GALICIA

Afundación tende unha ponte coa arte cubana contemporánea

‘Soño de navegante’ reúne case 60 obras de artistas cubanos actuáis entre os que atopamos nomes xa asentados como o de Roberto Fabelo, Manuel Mendive, Pedro Pablo Oliva e Alfredo Sosabravo xunto ao de outros artistas noveis. A exposición pode visitarse na Sede Afundación (Policarpo Sanz 24-26) ata o próximo 29 de outubro.

Viaxar a Cuba e agora posible sen necesidade de cruzar o Atlántico. Na Sede Afundación inaugurouse ‘Soño de Navegante’, unha mostra a través da que nos trasladamos ao país caribeño a través das cores, as formas e as simboloxías. Está presente na mostra o etnicismo, as tradicións pagás e tamén eses lazos comúns que unen a Galicia con Cuba.

A partir dun proxecto en colaboración coa Colección de Arte Cubano Contemporáneo Luciano Méndez Sánchez e a Fundación Salamanca Ciudad de Cultura y Saberes, preséntase «Sueño de navegante», unha exposición conformada por cincuenta e sete obras pertencentes a esta importante colección. Estruturada en catro seccións, o director do proxecto, Juan Carlos Moya Zafra, e as dúas comisarias, Yadira de Armas e Ana Gabriela Ballate, concibiron unha exposición enfocada a reflectir a identidade propia da arte actual en Cuba, en relación coas influencias tricontinentais (africana, latinoamericana e europea) dunhas creacións impactantes nos seus formatos, o seu expresionismo e na poesía da súa linguaxe.

De entre a relevante nómina de creadores cubanos presentes na mostra, cómpre destacar a presenza dos catro piares de referencia da arte contemporánea na illa: Roberto Fabelo, Manuel Mendive, Pedro Pablo Oliva e Alfredo Sosabravo, os catro merecedores do Premio Nacional de Artes Plásticas, condecoración que outorga cada ano o Ministerio de Cultura da República de Cuba, e con importante recoñecemento dentro e fóra da illa. A estes súmanselles outros importantes artistas, de ampla traxectoria ou noveis, representados a través dunha selección de obra multidisciplinar: pintura, fotografía, escultura, audiovisual, instalación e outras técnicas mixtas para unha exposición diversa, intensa e de gran beleza.

As obras pertencen á colección privada de Luciano Méndez Sánchez, quen comezou a coleccionar arte tras a súa chegada a Cuba, na primeira década do século XXI. Afincado alí desde entón, a súa colección posúe na actualidade máis de 800 obras representativas da creación cubana contemporánea. A exposición «Sueño de navegante» propón un escenario cunha diversidade de contidos en relación a Cuba, a súa cultura e idiosincrasia, desde unha mirada sociolóxica, antropolóxica e artística con temas referentes á identidade, a racialidade, a insularidade, a migración ou a mestizaxe. Así, nesta mostra están presentes 26 artistas cubanos, cuxas obras reúnen a intensidade do potente expresionismo caribeño, combinado cun carácter reflexivo, introspectivo e dunha gran carga emocional.

VIALIA

DATAS: Do16 de xuño ao 29 outubro (agosto pechado)
HORARIO: Luns a Sábado 17.30 a 20.30 h; Domingos e festivos pechado.
ENTRADA: Gratuíta