A Reconquista terá lugar os días 30 e 31 de marzo de 2019 – A Movida

A Reconquista terá lugar os días 30 e 31 de marzo de 2019

Hoxe na Praza da Constitución presentouse o cartel e a programación da nova edición da Reconquista de Vigo, que xa cumpre 25 edicións. Os eventos centrais serán os días 30 e 31 de marzo, mais haberá outras actividades ao longo do mes. 

Cartel obra de Nuria Pazos

Como xa vos comentamos anteriormente, esta edición da famosa Reconquista da Vila de Vigo promete ser a máis ambiciosa que se recorda, xa que desde a organización aspiran a converter a esta celebración histórica en Festa de Interese Turístico Nacional. Pola súa historia e significación, tanto local como nacional, o obxectivo semella complicado pero posible. A festa cumpre con todos os requisitos necesarios para conseguilo, pero lle falta maior repercusión a nivel estatal. Se non se consegue para este ano, intentarase para o que vén.

Este luns pola mañá presentouse o cartel da vixésimo quinta edición da Festa da Reconquista, obra da artista Nuria Pazos, que terá lugar os próximos días 30 e 31 de marzo de 2019. Na ilustración podemos ver a unha rapaza nova de mirada seria debuxada a lapis con destreza. As únicas cores do cartel son os vermellos e azuis, que semellan pintados con acuarela.

Ademais da imaxe da festa, tamén coñecemos a súa programación. Os días grandes da festa serán o 30 e 31 de marzo, pero haberá outras actividades durante todo o mes. Por exemplo, do 7 ao 23 celebrarase novamente o concurso gastronómico Re-tapas, sendo o 28 a entrega de premios. O 27 será a quenda das nenas e nenos, que poderán participar na súa particular Reconquista. Como novidade, recupérase o evento da destitución da corporación por parte dos franceses, ou sexa, a toma da Vila de Vigo, que non se realizaba desde o ano 2015. Este acto terá lugar o día 23, e posteriormente haberá unha cea a que pode asistir quen queira reservando praza, sempre que vaia caracterizado de época.

 

Compartir
X