A cultura británica enche o Pazo de Castrelos cun ciclo de cine ao aire libre
Esta mañá, o alcalde de Vigo presentaba o ciclo Era una vez en una mansión británica, para conmemorar o centenario da doazón do Pazo de Castrelos ao pobo de Vigo. Seis proxeccións ao aire libre —nos xardíns da parte dianteira do Pazo— arredor da cultura británica e as grandes mansións inglesas, ligado ás orixes deste espazo histórico. As sesións cinematográficas celébranse do 22 de agosto ao 6 de setembro, os venres e sábados a partir das 22:00 h.
O acceso é libre ata completar o aforo. Haberá arredor de 200 cadeiras, puidendo tamén gozar da proxección de pé, rodeando a zona. Segundo Abel Caballero, un dos obxectivos principais desta proposta é poñer en valor o Parque de Castrelos, conmemorando os cen anos da doazón do Pazo, por parte do Marqués de Alcedo, para o seu uso público.
Búscase que os vigueses e viguesas se familiaricen, especialmente, cos xardíns e co Pazo de Castrelos. O alcalde destaca que, se ben o parque de Castrelos é máis coñecido e visitado, os xardíns e o Pazo —así como a súa parte de atrás, co xardín inglés e o francés— non son de uso xeralizado.
A través da cultura cinematográfica, preténdese evocar aos tempos nos que o cine en exteriores era unha experiencia cotiá, poñendo o foco no valor patrimonial do Pazo Quiñones de León e a súa fermosa contorna.
As películas serán proxectadas os venres e os sábados ás 22:00 h. A maioría delas, están ambientadas nas grandes mansións inglesas e na british culture.
CARTELEIRA COMPLETA
- Venres 22 de agosto: Corgi: Las mascotas de la reina. (Todos os públicos).
- Sábado 23 de agosto: Emma.
- Venres 29 de agosto: El jardín secreto.
- Sábado 30 de agosto: Puñales por la espalda.
- Venres 5 de setembro: Misterio en Venecia.
- Sábado 6 de setembro: Antes de Nós.
A última proxección é sobre a vida de Castelao, con motivo da conmemoración do ano de Castelao no 2025, polo 75º aniversario da súa defunción.
