CAMELIAS MASCOTAS

O Castro estrea túneles, patio de armas e polvoreira

Publicado o por

Despois de anos de traballos, este xoves 14 a fortaleza do Castro estrea novos puntos de interese. O principal son os túneles subterráneos que transcorren polo interior da muralla ata o patio de armas, que mostra unha cara renovada. Alí tamén está situado a polvoreira, dotada dunha gran pantalla que explica a historia do recinto. (Fotos: P. Vázquez)

Saída dos túneles ao patio

Nos últimos anos a fortaleza do Castro, que data do século XVII, está a vivir unha segunda xuventude. Hai unha década derrubouse o restaurante El Castillo, situado xunto a un dos seus muros. En 2020 acometéronse numerosos cambios relacionados coa mellora da iluminación, tanto das murallas como dos túneles. Foi nese ano cando tamén se melloraron algúns accesos e se engadiron bancos e unhas gradas de formigón na cara máis septentrional do forte. Para facer máis visible a fortaleza desde o resto da cidade, procedeuse a tala dalgunhas árbores adxacentes, práctica bastante habitual nestes últimos anos por parte do goberno local.

A mediados do pasado mes de maio abríronse de xeito puntual ao público os túneles subterráneos do Castro, polos que se accede nunha entrada situada na cara leste do recinto. O acondicionamento destes pasadizos, máis a limpeza dos muros e outras zonas, durou dous anos.

Entrada as túneles

Ruta polos túneles

A entrada aos túneles é un dos puntos máis interesantes da visita, pois ten un trazado en zigzag para evitar que os invasores utilizasen os seus arietes contra a porta. O interior é bastante escuro, con pequenos puntos de luz que iluminan o teito abovedado. A altura durante parte do breve percorrido é suficiente para ir de pé, pero nalgúns puntos as persoas que midan máis da media van ter que encoller un pouco a cabeza se non queren deixar o cabelo nesas antigas pedras.

Interior dos túneles subterráneos

Xusto antes de saír ao patio de armas, unha pantalla nos mostra unha recreación dunha batalla contra o exército inglés, cuns efectos de son que procuran unha experiencia máis inmersiva. Xa no exterior, o renovado patio de armas loce uns postes informativos con diferentes datos históricos e militares do asedio inglés de 1719. No resto da fortaleza tamén se colocaron unha serie de paneis con máis datos sobre o Castro e a súa historia.

Patio de armas

No interior da polvoreira, outra estancia abovedada de pedra, atopamos, ademais duns bancos de madeira, unha gran pantalla led na que se nos conta, en galego e con subtítulos en castelán e inglés, a historia desta senlleira construcción. O patio de armas permanecerá sempre aberto, mentres que os túneles e a polvoreira precisan de reserva previa para poder acceder.

REVISTA NOVEMBRO
Polvoreira

Se queres saber por que hai túneles debaixo da fortaleza e onde teñen a súa saída, neste artigo sobre o Vigo subterráneo sacamos á luz esta e outras curiosidades sobre os pasadizos da cidade.

Visitas guiadas

A partir do luns 18 de setembro esta ruta poderá realizala de xeito gratuíto calquera persoa interesada os luns e os venres de 11:00 a 13:00 h. As posibilidades amplíanse amplíase a partir de outubro cando poderá visitarse todos os días da semana agás luns e venres, que están reservados para visitas escolares. O horario será de 11:00 e as 14:00 h e os sábados tamén pola tarde, de 17:00 a 20:00 h. Por outra banda, o recinto da fortaleza onde se encontran os paneis expositivos e audiovisuais será accesible de luns a domingo de 11:00 a 22:00 h.

The following two tabs change content below.
My LinkedIn profileMy Vimeo channel

Pablo Vázquez

Graduado en Comunicación Audiovisual pola Universidade de Vigo, é un apaixoado do cine, da música e da fotografía. É director dos documentais 'O profesor', 'The Death: el reencuentro' e 'Cuna de músicos', ademais de coautor do libro 'Son da cidade', o que lle fixo coñecer aínda máis a escena musical viguesa. Ten traballado con distintos grupos e salas da cidade, ademais de participar nos últimos anos como Xurado Novo nos festivais de cine de San Sebastián e Novos Cinemas.