O 8M continúa todo marzo
Onte Vigo tinguiuse de violeta. As mulleres tomaron as rúas pedindo igualdade. Aínda que o gran día foi onte, durante todo o mes de marzo hai actividades nas que a muller é a gran protagonista.
María Xosé Queizán é sen dúbida algunha un referente do feminismo vigués. Este luns día 11 o Ateneo Atlántico réndelle homenaxe cun coloquio arredor da súa figura na Casa da Cultura Galega no que intervirán: Rosa Cobo, Carme Adán e Mónica Bar. Se queredes saber máis sobre Queizán tamén podedes facervos coa revista A Movida de marzo onde a entrevistamos para a sección Viguesa do mes.
A educación é vital no camiño a unha sociedade máis igualitaria. Este sábado temos dúas actividades con foco de muller dirixidas aos cativos. A primeira delas na biblioteca Juan Compañel ás 12:00 ‘Contos violetas para menos e nenas’ e pola tarde outra sesión de contacontos na Casa do Libro ‘Contos polo Día Internacional da Muller’. En Libros para Soñar tamén avogan pola igualdade e o venres 15 organizan a sesión Mulleres que contan a cargo da actriz, contacontos e escritora Paula Carballeira.
Todos os sábados de marzo ás 17:30 podemos acudir no Museo do Mar a visita temática Mulleres do Mar, na que aprenderemos o importantísimo papel que xogou a muller neste eido. Outra cita para as fins de semana, pero nun ámbito moi diferente, a temos na sala Kominsky coa súa proposta ‘Girls just wanna have fun’ na que participarán as artistas: Linda Lamar Salada, Bambaataa Va en Bata, Pelea Física con Sandra e Isa, Isa Alabama y Bea-Beita-Beiña.
Desde a concellería de Igualdade tamén se levan desenvolvendo actividades durante todo o mes. Este martes 12 proxectarase o filme Contraaluz no salón de actos do Museo MARCO. O mércores 13 haberá un recital aberto de poesía sobre xénero e igualdade coa escritora viguesa Iolanda Zúñiga. Música o venres 15 a cargo do grupo Habelas Hainas no Museo MARCO e o sábado 16 terá lugar o roteiro feminino ‘Sons de mulleres’ a cargo de María Casar. Percorre quince puntos, algúns deles espazos emblemáticos da cidade nos que perdura a memoria dos traballos das mulleres. Por último, o MARCO albergará o día 22 ás 20:00 a proxección das curtas Consello Municipal da Muller de Vigo. 25 anos facendo camiño, de Xisela Franco; Benvidas ao club, de Carmen PG Granxeiro; e Conversa cunha muller morta, de Sonia Méndez.
Este martes comeza o ciclo de cine Mulleres na Sede Afundación coa proxección de La Librería de Isabel Coixet, seguiralle o 27 de marzo Figuras Ocultas de Theodore Melfi, o 2 de abril Muchos hijos, un mono y un castillo de Gustavo Salmerón e por último o 9 de abril Tres anuncios a las afueras de Martin McDonagh.
O camión das Ramonas on tour desembarcará na Porta do Sol o venres 15. Esta proposta da Deputación de Pontevedra arrancará ás 10:00 da mañá. Desde ese momento poderase visitar a exposición sobre a muller no mundo da música e sobre a Comandanta Ramona e as mulleres zapatistas (aberta ata as 0:00 horas da noite) e tamén terá lugar o primeiro obradoiro sobre relacións tóxicas e a igualdade, destinado ao alumnado de ESO. O primeiro pase das actuacións será ás 11:30 horas, cunha proba de son a modo de concerto didáctico coas Ramonas. Xa pola tarde, ás 19:00 horas comezarán os faladoiros sobre a muller na industria cultural, Nunca máis sen nosoutras. Participarán a música Belén Lamas, a artista gráfica Lupita Hard e Marcia Vázquez da Asociación 85C. A partir das 22:30 horas as Ramonas on tour comezarán o seu segundo concerto do día, enfocado esta vez ao público xeral, e levarán de convidadas a Linda Lamarr (Belén Lamas), Coral Alonso, Seilaesencia e Area.
A fin de semana do 22 ao 24 de marzo terá lugar a segunda edición do Festival Nas Verzas, máis duras cós cañotos das verduras. Un evento de música punk que ten por obxectivo visibilizar o traballo feminino na música. O venres na sala Doppler actuarán grupos como Cheap Lipstick, S.e.r.p.i.e.n.t.e o sábado 23 no Tinta Negra haberá un mercadiño artesanal durante todo o día, unha mesa redonda sobre as pioneiras no punk por Uter Zine e na Sala Kominsky actuarán Decibelikas.
