10 + 1 libros sobre música galega para ler este verán
O bo tempo fai que ler ao aire libre, xa sexa na praia ou á sombra dunha árbore, sexa unha das actividades máis pracenteiras do verán. Recompilamos dez libros, máis un bonus track, que falan sobre a nosa música desde diferentes puntos de vista e persoeiros.
CANCIONEIRO GALEGO SERODIO (1989 – 2012) (2025) de Xabier Díaz | Autoeditado
Nesta obra o pandeireteiro coruñés Xabier Díaz recompila moitas das súas recollidas ao longo e ancho de Galicia durante máis de vinte anos. A transcrición dos textos líricos das case cincocentas entrevistas que foron realizadas neste tempo, vén adornada de anécdotas, sorpresas, e fantásticas historias das propias informantes, protagonistas tamén das fotos, e dunha morea de audios orixinais das compilacións.
CANTAREIRAS (2025) de Icía Varela e Xosé Manuel Varela | Xerais
Seguindo coa música tradicional, a pandeireteira Icía Varela e o investigador Xosé Manuel Varela realizan un percorrido polo legado da música e a poesía popular. Nestas páxinas non poden faltar As Vellas de Mens, Eva Castiñeira e Adolfina e Rosa Casás.
BIBIANO, CAMBIAR PARA SER UN MESMO (2025) de Carlos Rego | Editorial Galaxia
Bibiano é unha figura ineludible da música galega e tamén viguesa. Foi promotor de concertos, axitador cultural, xerente de salas, responsable de proxectos como a aula de Música Moderna y Electrónica na actual EMAO, membro de Voces Ceibes e músico innovador.
VERSO E ACORDE (2024) de Alberto Pombo | Xerais
Por que se buscaron a literatura galega e a música tras o golpe de Estado de 1936? Como naceu a música infantil galega? Cales son as orixes do pop galego? A rigorosa e interesantísma investigación realizada por Alberto Pombo dá resposta a estas interrogantes e deita moita luz sobre as relacións entre a literatura e a música galegas.
ANOS 80. MOVIDA, ATLANTISMO, VANGARDISMO, UNDERGROUND (2024) de Fernando Fernández Rego | Editorial Galaxia
Os anos oitenta en Galicia foron moito máis que a Movida Viguesa, e iso demóstranos o autor nesta completa obra sobre aqueles anos de vangarda e cambio. Un percorrido por esa década intensa e rupturista que marcou o futuro da música e das artes en Galicia, xa que o libro tamén inclúe outras disciplinas como os fanzines, o audiovisual, a poesía e a plástica. Preme aquí para ler a entrevista que lle fixemos ao autor con motivo da publicación deste libro. Por suposto, non podemos deixar de recomendar outra obra de Fernández Rego, a máis ambiciosa ata o momento da literatura musical galega: Unha historia da música en Galicia. 1952-2018.
¿CUÁNDO SE COME AQUÍ? EL GRAN GOLPE DE SINIESTRO TOTAL (2024) de Sara Morales | Efe Eme
Este disco de Siniestro Total abandeirou a corrente máis vándala do pop e o punk dos primeiros anos 80, cun descacharrante sentido do humor, delirante ironía, incorrección intelectual e unha completa liberdade artística. Neste libro, Sara Morales reconstrúe a súa historia.
GALICIA MUSICALIDADE (2024) de Noel Turbulencias e Victoria Sánchez | Autoeditado
O xornalista musical coruñés Noel Turbulencias e a ilustradora murciana Victoria Sánchez sacaron adiante este proxecto autoxestionado no que resumen de xeito visual e accesible a historia da música galega. Cen páxinas nas que atopamos a artistas como Golpes Bajos, Siniestro Total, Terbutalina, Carlos Núñez, Baiuca, Iván Ferreiro, Xoel López, Novedades Carminha, Tanxugueiras ou Cora Novoa.
SON DA CIDADE (2022) de Pablo Vázquez e Denis Carballás | Editorial Galaxia
Vigo sempre foi un berce de músicos e este libro ilustrado demostra que o continúa a ser, recompilando medio centenar de artistas vigueses que tiveron (e seguen a ter) relevancia neste século XXI. Do rock ao trap, pasando polo folk, reggae ou jazz, nas súas páxinas altérnanse textos, debuxos, fotografías e discos destacados.
FERREÑAS & ROCK AND ROLL (2019) de Iria Pedreira e Laura Romero | Baía Edicións
Ferreñas e Rock and Roll é un catálogo ilustrado a toda cor no que se outorga protagonismo a trinta e unha músicas ou formacións integramente femininas que marcaron un antes e un despois tanto nos seus respectivos estilos como no conxunto da música galega.
LOS CONTENTOS. CUANDO RÍES (2014) de Piti Sanz e Fernando Fernández Rego | Xonix Records
Libro difícil de atopar que volve estar de actualidade tras a recente e prematura morte de Piti Sanz, músico poliédrico nado en Huelva e fundador de Los Contentos, grupo pioneiro do garage galego a finais dos oitenta. A súa traxectoria foi breve e, malia que agora o seu legado está máis reivindicado, continúan a ser un grupo de culto bastante descoñecido.
MACROFESTIVALES. EL AGUJERO NEGRO DE LA MÚSICA (2023) de Nando Cruz | Ediciones Península
Malia que esta obra de referencia versa sobre os festivais de música a nivel estatal e mesmo internacional, Galicia e os seus festivais aparecen bastante representados nas súas páxinas, e non para ben: pago de cachés máis altos do habitual, subvencións a dedo por parte das administracións públicas…
Pablo Vázquez
Últimos posts de Pablo Vázquez (ver todos)
- SonDeSeu: a primeira orquestra folk de Galicia celebra o seu 25º aniversario - 8 Maio, 2026
- Picnic Sesións: a revolución cultural de Saiáns que naceu no corazón de Radio Costeira - 24 Abril, 2026
- As dúas tendas de discos máis veteranas de Vigo súmanse ao Record Store Day - 16 Abril, 2026
- A biblioteca de Schrödinger: vai ter por fin Teis unha biblioteca ou só unha sala de lectura? - 16 Abril, 2026
- O Festival de Cans acollerá seis estreas na sección Furacáns - 14 Abril, 2026